Madaa kootu hin Qooru

Ni aarta, daftee mufatta jedhanii natti himuu

    Namticha aartu sana jedhanis na waamu

       Inni dafee aara obesee hin dabarfatu

Yaada isaa tasgabbiin danda’ee hin ibsatuJedhu ana duubas baayee na hamatu

           Dallansuun fira kee kolfi alagaa kee

Aariin kee baay’atee obsii kee maa xiqqaate

    Jedhee natti siqee namuu na hin gaafatu

       Dallansuu koo faarsu isaan na hamatu

           Aari koo leellisuu foon koo na ciratu!

Madaa wayii beektu madaa kan mogolee

 Kan nama hin teessifne diriirfatan malee

   Kan nama hin deemsifne yoo tiratan malee

     Madaa kanan qaba Abbaa koorraan dhaale

        Innis natti himeera Akaakan akka eegale

Tarii fayyaa jedheen madaa koon kunuunsa

         Qorchaa barbaaduuf oggeessaan dubbisa

              Suutan tarkaanfadhaa obseetan gubaasa

                 Innii fayyuu didee daranuu kulkula

                  Ni qooraa yoon jedhe itti hammaate bula

 Yookiin summiin isaa garatti dacha’ee na fudhatee hin darbu

Yookiin madaa fayyee fayyaa isan hawwu ija koon hin argu

Ni aara naan jedhu obsee hin dabarfatu

      Madaa koo kanatti falaxaa itti horfu

Isan an sossobee kunuunse kunuunsee qoorsu

    Isaan guyyaa guyyaan na jalaa boochisu

Miirri dhukkubbii isaa qaama koo bobeessaa

      Muddaa mudhiin isaa na dhoweera deemsa

          Madaa kootu hin qooru maafan aaruu dhiisa

…………………………………………

Tasfayee B. Birmajii
Ebla 16, 2013
Bonn, Germany