HD GS ABO Jaal Dawuds Ibsaa namoota isaan jajjabeessaniif xalaya galataa Onkoloolessa15, 2013 barreessan keessatti rifaatuu balaa tasaa mudateen tuqamanis, hirmaannaa fi birmannaa seexessaa golee Oromiyaa fi addunyaa mara irraa isaanif darbeen akka jajjabaatan dhaaman.
“Obseen
hanga waliin jiraannetti kan miseensotaa fi ummata keenya naannoo Asmaraa jiraataniin beekamtu akka dirmattuu rakkina namaa, kanneen
dhukkubsatan biraa kan hin dhabamne, dubartoota Oromoo naannoo sana
turan rakkina naannoo sanaa waliin akka irra aananiif walitti qabuu fi
rakkina isaanii bira dhaabbatuun qooddatuu, bakka gaddaa fi gammachuutti
waliin argamuu dhaan dha,” kan jedhe dhaamsi Ob Daawud Ibsaa kun, addatti ammoo dubartoota rakkina jireenyaa fi maatii qaban biraa
dhabamtee akka hin beeknes mirkanneessee jira.
“Obseen kana kan gooteef akeeka biraaf
osoo hin taane amaluma qabduu fi qalbii irraa fi onnee irraa rakkina
nama waliin qoodatuu umamaan qabdu irraa akka tahe ragaan kanneen waliin
turn tahuttiin amana,” jedha dhaamsi Ob Daawud kun.
“Hariiroo Obseen nama waliin qabdu
garaagarummaan siyaasaa hin daangessu,” kan jedhe kun, “nama hunda
waliin hariiroon ishee kun diriiraa dha.”
Obseen
sirnaan barnoota fudhatuun miseesummaa ABO guttee dirqama ishee bahaa
akka turte kan ibse xalayaan kun, ”erga Norway seentees hanga lubbuun
ishee darbu Konyaa ABO Bergen keessatti dirqama miseensummaa ishee bahaa
turuun beeka. Kanaaf Obsee akka haadha manaattis akka jaalattis dhabe.”
Mudde
2012 obbolaa ishee kan waggaa 10f adda bahan wal arguuf gara Norway
sochootee kan turte Aadde Obseen obbolaa ishee waliin wal arguun
dandeessus, bobbaa ishii yeroon xumurattee otuu gara duubbee qabsootti
hin deebi’iin “akka tasaa gaafa 09-10-2013 akka hamaatti dhukkubsatte
Hospitala seentee gaafa 11-10-2013 dadhabuu ishee dhagahuun hagam akka
ulfaataa tahe ibsuunuu rakkisaa dha, kan jedhe xalayaan kun, ammoo tahe
kunoo qalbiin amanuu rakkattuus dhugaa dha,” jedheera.
“Obseen
balaa tasaa nu mudate kanaan nu irraa dadhabuu irraa kanneen gadda
keessan ibisitan, maatii jajjabeessitan fi ibsataa jiratan hundaaf
galata guddaa kabajaa waliinii isiniif haa tahu,” ka jedhan Ob Daawud,
waan rifachiisaa fi garaa nama gubu akkasii irraa illee akka Oromoo mara
baraaru hawwii isaanii dabarsanii jiru.
Ob Daawud dhaamsa isaanii yeroo xumuran,
qaamota hawaasa isaan jajjabeessan tarreessun yeroo
galateeffatan,”hogganoota ABO hunda, konyaalee ABO, miseensota mataa
mataan gadda keessan E-mailiin naaf ergitan, miseensota, qondaalota ABO
fi hogganootaa ABO kan turtanii fi ejjennaa siyaasaan adda bane jirruu
keessaa kanneen gadda keessan e-mailiin kallattiinii fi karaa namaas
natti dhaamtanii fi dhaamaa jirtan mara, waldaalee amantii addaddaa
biyyoota garaa garaa irraa gadda keessan mata mataan karaa nama,
telefoonaan fi e-mailiin naaf ergitan, kanneen karaa dhaamsa ergitan
rakkattan maraaf, walumatti, hunda keessaniif galata guddaan ibsadha;
hunda keessaniif kabajaa guddaan qabu maqaa koo fi obbolaa Obseen
ibsadha,” jedhanjiru.
Sirna awwaalchaa Aadde Obsee Onkoloolessa
25, 2013 Normey, Bergen keessatti raawwate irratti akak ibsametti,
Aadde Obsee Taadassaa Margoo abbaa ishee obbo Taddasaa Margoo fi harmee
ishee addee Enkuayehush Hundee irraa Sadaasa 29 bara1976-tti Oromiyaa Lixaa, magaala Mandii Ganda 01 keessatti dhalaatte.
Dhukkuba tasaa Onkoloolessa 8 bara 2013 qabeen wal’aansa hatattamaa mana wal’aansaa naannoo Bergenitti yaalamaa erga turtee booda, Onkoloolessa 11 bara 2013 addunyaa kana irraa ka boqotte Aadde Obseen, jalaalli Oromoo fi Oromummaa ishii kan daangaa hin qabne, nama uumaan garaa lafinaan guutamte fi nama hunda gargaaruuf fedha qabdu, haadha namummaa ta’uun illee sirna awwaalchaa irratti ibsamee jira.
No comments:
Post a Comment